رواية مكتملة بقلم عمرو راشد-٢

شوية
من ايه يا حبيبتي
عادي من الروتين وبعدين بقالي كتير مبخرجش ف عادي يعني
طب ايه رأيك آاخد اجازة من الشغل ونسافر اي مكان نغير جو
خليني افكر
لا الحاجات دي مش محتاجة تفكير لازم القرار يكون في ساعتها كدا ايه رأيك
طيب ممكن نأجلها شوية
ليه
معلش مش حاسة اني في مود حلو يخليني اسافر حاليا
ماهو احنا بقا هنسافر عشان نغير المود دا
معلش يا مروان خليني على راحتي
زي ما تحبي يا حبيبتي ولو غيرتي رأيك في اي وقت تعالي قوليلي
نمنا احنا الاتنين او تحديدا مروان بس هو اللي نام اما انا فضلت صاحية للصبح مين هيجيله نوم بعد اللي حصل دا انا حاسة اني في حلم ومش عارفة اصحا منه حلم صعب عليا أوي ونفسي يخلص بس في نفس الوقت انا هخاف لما يخلص هخاف لاني حاسة اني قوية حاسة اني عندي حد يحميني من اي حاجة حاولت انام عشان اعرف افكر واشوف هعمل ايه في اللي جاي مكملتش ساعتين وفوقت لما سمعت صوت باب الشقة وهو بيتقفل.. وسمعت صوت خالتي و بودي وهما داخلين طبعا اكيد امي كلمتهم وعرفو اني موجودة هنا غيرت هدومي وخرجت كان مروان نزل الحمدلله اول ما خالتي شافتني خارجة كانت هتقوم وتحضني زي ما بتعمل كل مرة تظاهرت بأني بحضنها عشان ماما متاخدش بالها من حاجة بعدها امي راحت عشان تقدملهم حاجة وانا قعدت معاهم
احنا عرفنا من امك انك جيتي عندها امبارح خير يا هند حصل ايه
السؤال كان من خالتي.. نبرتها كانت حنينة كأنها بتمثل عليا
محصلش حاجة يا خالتو انا كويسة
اصل غريبة ان مروان ييجي معاكي يعني
وايه الغريب فيها انا ومروان حبينا نغير جو عادي يعني
وهو اللي بيغير جو بيروح عند امه!!
اتنرفزت من فضولها الزايد وبدأ صوتي يعلى
هو انتي عايزة مني مالك انتي ومالي هو انا مش قولتلك ملكيش دعوة بيا تاني ولا بأي حاجة تخصني
انا خالتك يا هند مهما كان.. مش عشان غلطت غلطة هتزعلي مني العمر كله و بعدين انا عايز اساعدك ووالله انا ندمانة على اللي عملته وعايزاكي تسامحيني
اسامحك على ايه انتي ډمرتي حياتي جوزي دا لو حصله حاجة هيبقا ذنبه في رقبتك انتي جاية تفتكري انك خالتي دلوقتي لا معلش بقا خالتي دي كانت زمان و احمدي ربنا اني لحد دلوقتي مقولتش لامي حاجة
بودي اتكلم ساعتها
ميصحش كدا يا هند احنا في بيتك
وهو انت يا بودي تعرف ايه اللي يصح واللي ميصحش أنت زيك زيها
بس احنا عايزين نساعدك ومستعدين نعمل اي حاجة عشان تطلعي من المشكلة دي
الحاجة الوحيدة اللي عايزاكو تعملوها انكو تسيبوني في حالي وكفاية اللي حصلي بسببكو انا مبقتش عارفة اثق في حد بسببكو بقيت مش مطمنة ومش عارفة اروح لمين اشتكيله كنت الاول بروح ليكي يا خالتي أنتي وابنك ياريتني روحت للغريب ومجتش عندك بس معلش ماهو انا وقتها مكنتش اعرف ان الغريب عمره ما هيفكر يأذيني زي ما انتو عملتو كدا
امي دخلت ساعتها وقالت
مين دا يا حبيبتي اللي عايز يأذيكي
رديت انا عليها
مفيش يا ماما كنت بحكيلهم عن ناس صحابي او كنت مفكراهم صحابي بس دول مش صحاب دول ناس قليلة الأصل
ولا يهمك يا حبيبتي الناس اللي زي دي خسارتهم مكسب
عندك حق يا ماما
امي حطت صنية العصير على الترابيزة
اتفضلو يا جماعة بالهنا والشفا
اتكلمت انا و رديت على امي
لا معلش يا ماما اصل خالتو و بودي كانو لسة بيقولو انهم ماشيين
امي استغربت و قالت
نهار أبيض تمشو ايه دا انتو لسة جايين
خالتي بصتلي ب عتاب بعدها ردت على امي
معلش يا حبيبتي احنا كنا جايين نطمن على هند وخلاص
قامو مشيو وأنا كنت لسة رايحة عشان ادخل اوضتي لقيت امي ندهت عليا
هو انتي متخانقة مع خالتك ولا ايه
لا أبدا هنتخانق ليه
اصل اول مرة اشوفكو بالشكل دا كأن في مشكلة بينكو
لا مفيش حاجة يا ماما متقلقيش
يعني أنتي مش مخبية حاجة يا هند
لا يا ماما مش مخبية بعد اذنك انا هدخل ارتاح
بقلم عمرو راشد
دخلت الأوضة